2Ch 35 | Ndebele | STEP | UJosiya wasesenzela iN kosi iphasika eJerusalema ; basebehlaba iphasika ngolwetshumi lane lwenyanga yokuqala .

2 Chronicles 35

Ukugcinwa kwephasika

1 UJosiya wasesenzela iNkosi iphasika eJerusalema ^a; basebehlaba iphasika ngolwetshumi lane lwenyanga yokuqala ^b. 2 Wasemisa abapristi kumfanelo zabo, wabaqinisela inkonzo yendlu yeNkosi ^c. 3 Wasesithi kumaLevi ayefundisa uIsrayeli wonke ayengcwele eNkosini ^d: Fakani umtshokotsho ongcwele ^e endlini uSolomoni indodana kaDavida inkosi yakoIsrayeli ayakhayo ^f; kakusengumthwalo kini emahlombe. Khathesi khonzani iNkosi uNkulunkulu wenu labantu bayo uIsrayeli ^g. 4 Njalo lizilungise ngokwendlu yaboyihlo ngezigaba zenu ^h, njengombhalo kaDavida inkosi yakoIsrayeli ⁱ lanjengombhalo kaSolomoni indodana yakhe ^j. 5 Lime endaweni engcwele ^k ngokwezigaba zendlu yaboyise babafowenu, abantwana besizwe, lesigaba sendlu kayise wamaLevi ^l. 6 Lihlabe iphasika, lizingcwelise, lilungisele abafowenu, ukwenza njengokwelizwi leNkosi ngesandla sikaMozisi ^m.

7 UJosiya wasenika abantwana babantu umhlambi wamawundlu lamazinyane embuzi, konke kungokwamaphasika ⁿ, kwabo bonke abatholakalayo, ngenani eliyizinkulungwane ezingamatshumi amathathu, lenkunzi ezizinkulungwane ezintathu; lokhu kwakuvela empahleni yenkosi ^o. 8 Iziphathamandla zakhe zasezinika abantu, abapristi lamaLevi ngokukhululeka. OHilikhiya ^p loZekhariya loJehiyeli ^q, izinduna zendlu yeNkosi, banikelela amaphasika ^r kubapristi amazinyane azinkulungwane ezimbili lamakhulu ayisithupha, lenkunzi ezingamakhulu amathathu ^s. 9 OKonaniya ^t loShemaya loNethaneli, abafowabo ^u, loHashabhiya loJeyiyeli loJozabadi, izinduna zamaLevi, basebenikelela amaphasika ^v kumaLevi amazinyane azinkulungwane ezinhlanu, lenkunzi ezingamakhulu amahlanu ^w.

10 Ngokunjalo inkonzo yalungiswa; abapristi basebesima endaweni yabo ^x, lamaLevi ngezigaba zawo, njengokomlayo wenkosi ^y. 11 Basebehlaba iphasika ^z, abapristi bafafaza kuvela ezandleni zabo ^aa, lamaLevi ahlinza ^ab. 12 Basebesusa iminikelo yokutshiswa ukuyinika njengokwezigaba zendlu yaboyise kubantwana babantu ukuze banikele eNkosini, njengokubhaliweyo egwalweni lukaMozisi. Ngokunjalo langezinkunzi. 13 Basebesosa iphasika ngomlilo njengokwesimiso ^ac; kodwa izinto ezingcwele bazipheka ^ad ngamabhodo ^ae langezimbiza ^af langezindengezi ^ag, bakusa masinyane kubo bonke abantwana babantu. 14 Lemva kwalokho basebezilungisela bona labapristi, ngoba abapristi amadodana kaAroni babesekunikeleni iminikelo yokutshiswa lamahwahwa kwaze kwaba sebusuku ^ah; ngakho amaLevi azilungisela wona labapristi amadodana kaAroni. 15 Labahlabeleli amadodana kaAsafi babesendaweni yabo njengokomlayo kaDavida ^ai, loAsafi, loHemani, loJeduthuni umboni wenkosi ^aj; labagcini bamasango babesesangweni lonke ^ak; kwakungesikwabo ukusuka enkonzweni yabo, ngoba abafowabo amaLevi abalungisela ^al. 16 Yasilungiswa yonke inkonzo yeNkosi ngalolosuku ukwenza iphasika lokunikela iminikelo yokutshiswa phezu kwelathi leNkosi, njengokomlayo wenkosi uJosiya. 17 Abantwana bakoIsrayeli ababekhona basebesenza iphasika ngalesosikhathi, lomkhosi wesinkwa esingelamvubelo, insuku eziyisikhombisa ^am. 18 Njalo kalenziwanga iphasika elinjengaleli ^an koIsrayeli kusukela ensukwini zikaSamuweli umprofethi ^ao; lawo wonke amakhosi akoIsrayeli kawenzanga iphasika elinje uJosiya alenzayo, labapristi lamaLevi, loJuda loIsrayeli wonke ababekhona, labahlali beJerusalema. 19 Ngomnyaka wetshumi lesificaminwembili wokubusa kukaJosiya iphasika leli lenziwa ^ap.

Ukufa kukaJosiya

20 Emva kwakho konke lokho, uJosiya eseyilungisile indlu, uNeko inkosi yeGibhithe ^aq wenyuka ukuyakulwa leKarikemeshi eYufrathi ^ar; loJosiya waphuma ukuyamelana laye. 21 Kodwa wathuma izithunywa kuye esithi: Ngilani lawe, nkosi yakoJuda? Kangenyukelanga ukumelana lawe wena lamuhla, kodwa ngimelene lendlu elwa lami ^as. Ngoba uNkulunkulu uthe ngiphangise; yekela wena ukuphikisana loNkulunkulu, olami, ukuze angakubhubhisi ^at. 22 Kodwa uJosiya kaphendulanga ubuso bakhe kuye ^au, kodwa wazifihla isimo ukuze alwe laye ^av; njalo kawalalelanga amazwi kaNeko avela emlonyeni kaNkulunkulu ^aw, kodwa weza ukulwa esihotsheni ^ax seMegido ^ay. 23 Abatshoki bemitshoko basebemciba uJosiya; inkosi yasisithi encekwini zayo: Ngisusani ngoba ngizwa ubuhlungu obukhulu. 24 Inceku zakhe zasezimkhupha enqoleni, zamgadisa enqoleni yesibili ayelayo, zamletha eJerusalema. Wasesifa, wangcwatshelwa emangcwabeni aboyise ^az; wonke uJuda leJerusalema basebemlilela uJosiya ^ba.

25 LoJeremiya wenza isililo ngoJosiya ^bb. Labo bonke abahlabeleli labahlabelelikazi bakhuluma ngoJosiya ezililweni zabo kuze kube lamuhla ^bc. Bazenza zaba yisimiso koIsrayeli; khangela-ke, zibhaliwe ezililweni ^bd.

26 Ezinye-ke zezindaba zikaJosiya, lezisa zakhe njengokubhaliweyo emlayweni weNkosi, 27 izindaba zakhe-ke, ezokuqala lezokucina, khangela, zibhaliwe egwalweni lwamakhosi akoIsrayeli lawakoJuda ^be.